Pinaksitay sa Cebu Coliseum

CEBU, Philippines - Masaksihan na ang walay hunong nga Mixed Martial Arts (MMA) ug kickboxing action sa "Yaw-Yan ArDigma Fighting Challenge (YFC) V: Recompense" karong alas-8:00 sa gabii diha sa Cebu Coliseum.

Katorse ka partisan sa mga elite MMA fighters ug kickboxers gikan sa Visayas ug Mindanao ang moladlad sa ilang kusog ug abilidad atubangan sa mga fight fans ug mahiligon sa martial arts.

"Karon nga medyo ni-grow na ang awareness sa mga Cebuano’s sa MMA maglaum ta nga mao na ni ang start sa pagsulbong sa kasikat sa maong sports dinhi sa atua," matud pa ni Yaw-Yan ArDigma Cebu founder Master Benigno 'Ekin' Caniga Jr.

Sa main event, ang garbo sa Yaw-Yan ArDigma nga si Kyle 'Hurricane' Co makigpinaksitay ni knockout artist  Mark 'Terminator' Araneta sa Unified MMA Mandaue.

Masukod usab ang abilidad ni Brazilian Jiu-jitsu expert   Johnlery Ian Caniga, anak ni Master Ekin batok ni Theodero 'Kid' Batuun sa Team Red Dragon.

Ang Sugbuanong si Renan Noblefranca sa Yaw-Yan ArDigma makighamag ni Steve Sevellino sa Unified MMA Cagayan de Oro City sa kickboxing main event.

Mosaka sab sa ring ang kanhi Universal Reality Combat Championship (URCC) fighter nga si Engie 'Destroyer' Piloto ug harungon niya si Arthur 'Spartan King' Barba sa Mindanao Unified Martial Arts (MUMA).

Ang mga tiket nagkantidad og P300 sa ringside ug P150 sa lower box. (BANATSPORTS)