UC Webmasters molarga China karong Agosto 10

CEBU, Philippines - Diyutay apan hinashasan nga 11-man University of Cebu (UC) Webmasters basketball team molarga ngadto sa Shenzhen, China karong Agosto 10 uban ang bug-at nga tahas sa labing una nilang pagsalmot sa 26th Summer Universiade.

Ang Universiade basketball event sugdan karong Agosto 13.

Gawas nga mohimo’g kasaysayan ang Webmasters sa pagkulit bisan usa lang ka daog didto sa Universiade, makapa-usab sa dagan sa ilang kampanya sa pagdepensa sa ilang korona sa Cebu Schools Athletic Foundation, Inc. (CESAFI) nga magbukas sa ilang ika-11 nga season karong Domingo, Agosto 7 diha sa Cebu Coliseum.

Si Atty. Baldomero C. Estenzo, ang team manager sa Webmasters nagkanayon nga wala sila magkuwang sa preparasyon alang sa maong torneyo tungod kay dugay na kini nilang gipangandaman.

Ang Webmasters nga maoy morepresentar sa Pilipinas sa basketball event didto sa Universiade, makigsangka sa Russia, Ukraine, Lithuania, New Zealand ug Japan ubos sa Pool C.  

Ang Webmasters pangulohan ni 6-foot-9 June Mar Fajardo, skipper Kelvin Juliane, Edward Pao, Quinton Brian Heruela, Francis Luigi Bercede, Gerald Ampoon, Jan Michael Auditor, Archie Batua, Hans Kibry Cabrera, Robinson Mohamamd ug Arvin Kim Gomez, anak ni coach Roel Gomez. Kuyogan sab sila ni CESAFI commissioner Felix Tiukinhoy.

Atol sa senemanang SCOOP Forum kagahapon didto sa Baseline Restaurant nga gidumala ni Bobby Inoferio, si coach  Gomez nagkanayon nga dili kabayran ang ila unyang makuhang kasinatian didto sa China nga daku’g ikatabang sa ilang pagdepensa sa ilang korona sa CESAFI.  - BANAT NEWS