Army sinilat ang Navy
MANILA, Philippines - Pinawi ng Philippine Army ang kabiguang tinamo sa first set nang manalo pa sa Philippine Navy, 23-25, 25-21, 25-22, 25-23, sa pagpapatuloy ng Shakey’s V-League Season 8 Open Conference kahapon sa The Arena sa San Juan City.
May 23 hits, 2 blocks at isang service ace si Michelle Carolino upang tulungan ang Army na makapagdomina sa Navy sa larong tumagal ng halos dalawang oras.
Liyamado ang Army sa kalaban dahil lagi silang nananalo pero nahirapan ang koponan ngayon dala ng mahinang reception.
“Lagi kaming angat sa kanila at plus five kapag kalaro ang Navy,” ani Army coach Rico de Guzman.
Nalimita ng Army ang Navy, 73-53, upang makasabay ang koponan sa nangungunang Ateneo at San Sebastian taglay ang 1-0 karta sa ligang inorganisa ng Sports Vision katuwang ang Shakey’s Pizza.
May 20 hits si Joanne Bunag para suportahan si Carolino habang si Mary Jean Balse ay tumapos taglay ang 10 spikes at 3 blocks.
Tumapos naman ng 20 puntos at apat na blocks si Suzanne Roces habang sina Nene Bautista at Michelle Laborte ay naghatid pa ng 16 at 15 para sa natalong koponan.
Suportado rin ng Accel, Mikasa at Maynilad Water, ang larong ito ay mapapanood ngayong ika-2 ng hapon sa NBN-4 at sa mga international channel GMA Pinoy TV, GMA Life TV at GMA News TV.
- Latest
- Trending
