CEBU, Philippines - Nagpangagot na ang pambato sa Team Yaw-Yan ArDigma nga si Kyle “The Hurricane” Co nga makiggera batok ni Mark “The Terminator” Araneta sa Unified MMA Mandaue sa main event sa giatangang “Yaw-Yan ArDigma Fighting Challenge V: Recompense” karong Agosto 6 diha sa Cebu Coliseum.
Ang 25-anyos nga si Co kinsa anaa na sa hustong kondisyon human sa kapin duha ka buwan nga ensayo, masuwayan batok ni Araneta kinsa nabaniog sa iyang gikalisangang knockout power.
Si Yaw-Yan ArDigma founder ug organizer sa maong fight card nga si Benigno “Ekin” Caniga Jr. nagtuo nga interesante ang sangka tali ni Co ug Araneta tungod sa managlahi nilang istilo ibabaw sa ring.
“I expect a good fight between Co and Araneta,” matud pa ni Caniga.“Pulos sila maayo nga striker ug duha ray ending aning awaya its either knockout o submission.”
Sa laing bahin, atangan usab ang come back fight ni Engi “The Destroyer” Piloto sa Yaw-Yan Ardigma batok ni Arthur “Spartan King” Barba sa Mindanao Unified Martial Arts (MUMA).
Gawas sa MMA, aduna say kickboxing event nga pagabidahan sa laing Yaw-Yan ArDigma fighter Renan “Limbas” Noblefranca batok ni Steve “D’ Lightning” Sevilleno sa Cagayan De Oro.
Ang tiket nagkantidad og P300 sa ringside ug P150 sa lower box. Alang sa dugang mga detalye, mahimong motawag sa numero 09198215582 o 09324524999. - BANAT NEWS