Theam Cargo/ Mambaling 2-0 na sa St. Augustine

CEBU, Philippines - Human ilampaso ang barangay Pardo sa miaging semana pinaagi sa pag-iskor og 91-63 nga kadaugan, misamot kamangtas ang Theam Cargo Forwarding Services/Mambaling dihang walay kukalooy nga ilang gidabodabohan ang AC Sports sa mas dakong iskor ug may layo kaayong biya sa iskor, 119-88 kaniadtong Sabado atol sa nagpadayong St. Augustine Cup 2011 basketball tournament didto sa Inayawan Sports Complex.

Ang kadaugan naghatag sa Theam Cargo ni coach Danny Duran ug 2-0 nga baraha aron maghupot sa solong liderato batok sa laing lima ka teams nga misalmot.

Ang Theam Cargo nga gipanag-iya ni Olive Paraguas ug gidumala ni Mambaling barangay councilor Emier Hamis isip team manager, nagkinahanglan lang sa solidong 1-2-3 combination nilang Danny delos Santos, Wowie Escocio ug Michael Sumayang kinsa maoy naghatag ug dakung danyos ngadto sa ilang kaatbang tungod kay sila maoy mi-iskor sa kapin sa katunga nga puntos nga nahimo sa ilang team.

Si Delos Santos kinsa usa ka beteranong sentro ug si Escocio, usa ka kusgan kaayong power forward, parehong mipugnit og 21 puntos matag usa samtang si Sumayang mibahug og lima ka three-pointers sa iyang 19 puntos.

Bisan pa man tuod og unom tanan ka players ang mihimo’g double figures alang sa AC sports, wala gihapon kini makatarug sa daw bungtod nga labaw sa hiniusang pwersa sa Mambaling nga naglakip kang kanhi PBA star Bonel Balingit kinsa wala makaduwa sa ikaduhang higayon alang sa Theam Cargo.

Anaa sab kanila silang Jerome Belano ug Michael Duran aron mosamot kalig-on ang ilang line-up aron sila kahadlokan isip lehitimong title-favorite niining sayong bahin sa torneyo.

Duha ka laing sinaligan sa Theam Cargo miamot sab og double figures aron ipakita ang ilang gikusgon.

Sunod kontra sa Theam Cargo mao ang Akira karong Miyerkules, ang Alberto’s Pizza unya sa Sabado ug ang CHV sunod semana diin tinguha nilang haruson ang tanang duwa sa elimination round.

Puntos matag usa:

Theam Cargo/Mambaling (119)— Delos santos 21, Escocio 21, Sumayang 19, Lopez 16, Daclan 14, Bleano 8, Lausa 6, Divinagracia 6, Duran 2

AC Sports (88)— Ramos 31, Luceño 12, Balansag 10, Rpnquillo 10, Arvante 10, Abatayo 10, Cabasa 6, Villahermosa 2, Talam .  - BANAT NEWS