Kenyan naghari sa Kawasan Marathon

CEBU, Philippines - Ang Kenyan nga si Abraham Missos ug beteranang si Christy Sevilleno-Tutor ang nidomar sa 1st Kawasan Falls Marathon niadtong Domingo didto sa Badian, Cebu.

Si Missos maoy naghari sa 42K men’s class human niya gitapos ang lumba   sud sa duha ka oras, 39 minutos ug 35 segundos. Laing Kenyan nga si Willy Tanui ang mipuwesto sa ikaduha sa oras nga 2:50.14.

Si Sherwin Managuil mao ang bugtong Pinoy nga nasulod sa top three finishers sa oras nga 2:53.10.

Sa iyang bahin, ang kanhi Queen of the Road sa Sugbu nga si Tutor miangkon sa korona sa women’s division dihang iyang gitapos ang lumba sa oras nga 3:37.26, gisundan ni Merlita Arias-Dunkin (4:20.00) ug Melinda Ponce (4:28.29).

Sila si Missos ug Tutor mibulsa og P20,000 matag usa isip ganti sa ilang pagpahiluna sa unang dapit.

Sa 21K half-marathon, ang defending Milo Marathon regional champion nga si Adonis Singson maoy naghari dihang siya nag-una paglabaw sa finish line sa oras nga 1:15.17, gisundan ni Elmer Bartolo sa Davao (1:15.35) ug Jordan Bacong (1:17.56) sa ikaduha ug ikatulong dapit.

Ang top three finishers sa 21K women’s category mao sila si Joeyry Lee (1:33:18), Madelyn Carter (01:34:41) ug Amale Jopson (1:49:25).   - (BANAT NEWS)