Sa Liga, ang mga duwa nindotang format lang maoy gubot

CEBU, Philippines - Welcome back Mandaue Landmasters-RDAK.

Nindot kaayong paminawon alang sa mga supporters sa Mandaue-Landmasters dihang nagbansiwag sa mga pamantalaan ang titulo “Landamsters kampiyon sa Cebu Leg”.

Misamot kini kaanindot kay didto mismo sa ilang balwarte sa Mandaue atol sa ikaduhang leg, ang Landmasters-RDAK midaog sa ikaduhang korona ug ang titulo “Landmasters kampiyon sa Mandaue Leg”. Dili usa, dili sab duha kon dili tulo gyod tanan ka titulo human modaug ang Landmasters didto sa GenSan Leg. Nakapanghupaw gud ug lawom ang taga Mandaue ug mi-ingon wow ang galing, yehey champion na sab.

Apan didto sa Cagayan de Oro Leg, nahitabo ang dakong milagro tungod sab lagi kay aduna may milagro sa basketball gipa-undayonan lang sab sa mga magikero nga mga kaliwat nilang David Blaine. Asa man ka mangita ug tournament sa tibuok kalibotan nga ang usa ka team nahimong champion tulo ka higayon sa duha lang ka buwan ug wala gyud nadawat nga pa-consuelo o incentive bisan gamay? ONLI IN THE PILIPINS NI.

Gawas lang tingali kung tuison o lubagon ang rule sa usa ka tournament, mahimo kini apan grabe sab ni ka kagapalan oi.

Lain pang disgrasya sa format, gawas pa nga walay incentive bisan na lang unta twice-to-beat, nawad-an pa gyud sa homecourt advantage. Busa, nahulog sa walay kwenta kadtong ilang dungog nga tulo ka kampiyonato.

Angayan gyud usbon ang lagda ug ang format sa Liga aron patas ug walay makabentaha. Nindot gyud unta og tarungon ug dala ang usa ka lega nga national in scope aron padayon kining suportahan sa mga basketball fans. Gani sa bisan asang ginagmay nga lega, aduna gyu’y twice-to-beat kung kinsa kadtong mo-abante sa semifinals nga mas taas ug standings o winning record ug bisan sa UAAP ug NCAA, ang team nga maka-sweep sa double round elimination mo-abante gilayon sa finals sama sa nahitabo sa University of the East nga 14-0 tulo na ka tuig ang milabay.

Ang ila ra gyung tarung nga gipahibalo mao ang pagkapili ni coach Jun Tan nga Coach of the Conference apan alang kanako binuang ang pagkapili sa usa ka Suzette Gentallan, secretary sa MisOr isip Executive of the Year kay angayan unta kini ihatag sa usa ka team owner o labing menos team manager dili kay adto sa sexy-tary gawas lang ug adunay hidden desire ang sakop sa board of judges.

Tungod niining hitaboa, wala malipay si Mayor Jonas Cortes sa Mandaue sa gibuhat ngadto sa Landmasters-RDAK ug hayan nga dili sila mosalmot sa 6th Leg karong Oktubre.

* * *

AZKALS 0-3. Dakong tahas ang gipas-an karon sa abaga sa Philippine Azkals human sila mapilde sa Kuwait, 0-3 kaniadtong Sabado sa 2nd round sa 2014 FIFA qualifying round. Karong Huwebes, Hulyo 28, suwayan sa Azkals paghimo’g dakong milagro aron makabawi sila apan ambot sayon ba kaha himoon ang 4-0 nga iskor batok Kuwait.

Posibleng lahi ang ipakita sa Azkals dinhi sa atong nataran atubangan sa kaliboan ka mga supporters tungod kay nahimo na kini nila batok sa Sri Lanka. Hinoon, mas lig-on ang Kuwait nga national team kung itandi sa Sri Lanka kung football maoy hisgotan.

MISCELLANEOUS. Belated birthday greetings to Dr. Armenia Tan, wife of Landmasters-RDAK coach Jun Tan last July 11. The birthday party was held in Cagayan de Oro, the hometown of Dr. Tan. - BANAT NEWS