King Khan mi-KO ni Judah

CEBU, Philippines - Way duda nga hapit na makab-ot ni British champion Amir Khan ang kasikat sa iyang higala ug world pound-for-pound king Manny Pacquiao, kini human siya milampos sa iyang unification bout batok sa amerikanong si Zab Judah kagahapon didto sa Las Vegas.

Lahi sa giatangan sa kadaghanan, usa ka one-sided ang sangka tali sa duha ka light welterweight boxer diin midominar si Khan kinsa mitapos ni Judah pinaagi sa fifth round knockout.

Sa maong kadaugan nadepensaan ni Khan ang iyang WBA title og nakuha usab ang IBF belt ni Judah.

Gamit ang iyang pabor sa gitas-on, giputos og jab ni Khan ang nawung ni Judah kinsa nagsalimuang pagsagang sa atake sa batos ni Freddie Roach. Wala musalir ang gisaligan nga labaw sa kasinatian ni Judah kinsa nagsugud na og kaluya sa ikaupat nga round human sa mga bangis nga kombinasyon ni Khan.

Pag-abot sa fifth round, usa ka nagpungasi nga body shot ang gipatama ni Khan ngadto sa kuto-kuto ni Judah kinsa miluhod og wala na makatubag pa sa ihap sa referee kinsa miundang sa away sa 2:47 sa maong round.

Miangal pa ang kampo ni Judah nga usa ka low blow ang gibuhat ni Khan, apan napamatud-an dayun kini nga sayup human gipasalida ang replay.

“If it had gone a few more rounds, I would have knocked him out with a clean shot,” matud pa ni Khan kinsa mipalambo sa iyang rekord ngadto sa 26-1, 18KOs, samtang si Judah nahagsa ngadto sa 41-7, 28KOs. - LPM gikan sa wires (BANAT NEWS)