CEBU, Philippines - Dakung hagit ang pas-anon sa Philippine Team Azkals aron mopadayun sa FIFA Asia World Cup qualifiers, kini dihang gidemolis sila sa Al-Azraq Kuwait , 0-3, kagahapon sa first match didto sa Qadsia Club stadium sa Kuwait .
Ang Azkals daling mibayahe balik sa nasud kagahapon aron hinuktukan ang ilang kapildehan batok sa mga Kuwaitis nga grabeng nakadominar didto sa ilang balwarte.
Dili lang daog ang buhaton sa Azkals batok sa Kuwait sa home game karong Huwebes didto sa Rizal Memorial Sports Stadium, tungod kay kinahanglan sila mohimo og usa ka perpektong 4-0 victory aron moabante sa second round sa qualifiers.
“We have a tougher job back home, but it’s not impossible,” matud pa ni Azkals manager Dan Palami sa abs-cbnnews.com. “In Manila , we will give Kuwait a very tough fight,” segun pa ni Azkals coach Hans Michael Weiss.
Kahinumduman nga sa ilang home game batok sa Sri Lanka niadtong miaging buwan, gibuntog sa Azkals ang Sri Lanka , 4-0.
Apan lahi sa Sri Lanka , mas lisud kini buhaton ngadto sa highly-ranked Kuwait kinsa mipamatuod sa ilang pabor sa kasinatian batok sa Azkals kagahapon.
Ang striker nga si Yousef Nasser mipasulod dayun og goal alang sa kuwait sa ika-16 minuto palang sa duwa, gisundan ni Musaed Neda. Pag-abot sa second half si Fahed Al-Ibrahim na usab ang mipalusot sa iyang goal taliwala sa depensa ni Fil-British Neil Etheridge.
Sa maong duwa, wala kaarte ang mga sinaligang striker sa National team nga si Phil Younghusband ug Chieffy Caligdon, samtang naluya usab sa kapisikal sa Kuwaitis ang Fil-Spaniard nga si Angel Guirado. - BANAT NEWS