Sutike Yama nidaog sa Ryle

CEBU, Philippines - Bag-ong team ni Rolly dela Pieza nga Sutike Yama mihipos na sab og daog batok sa Ryle Trucking, 72-63 sa Phase 3 Camella Homes Sunday Club basketball tournament didto sa Villas Magallanes gym sa Lapu-Lapu City.

Wala kapugngi ang pagmangtas ug pagpanginit ni Hinoguin, kinsa walay sipyat sa iyang upat ka free throws alang sa iyang siyete puntos. Hinuon ang team owner nga si dela Pieza maoy nangu sa Sutike Yama pinaagi sa iyang 14 puntos, samtang duha sa iyang teammates ang mi-iskor sab og double figures. Si Centes Brañanola mipupo og 13 puntos ug si Bebot Pleños miani og 12 puntos.

Ang Sutike Yama nakapundo og siyete puntos sa first quarter, 24-17 ug miburot kini ngadto sa 13 puntos sa halftime, 41-28.

Miratsada ang Ryle Trucking sa third period diin nakan-an ang labaw ngadto na lang sa sayes puntos, 51-57, apan nausik lang ang ilang mga paningkamot kay grabe man sab kaayong nakaduwa ang Sutike Yama.

Sila si Saavedra ug Oyaniz nagkumboya og 28 puntos alang sa naparot nga Ryle Trucking.

Sa laing duwa, ang White-Miami mikulit sa ilang ikasiyam nga daog human nila pahamtangi og laing kapildihan ang Red-Dallas sa iskor nga 99-94.

Si Ondo Casquejo milansang og 37 puntos aron pangulohan ang White, samtang si Amay Palad mao sab ang nangu sa Red pinaagi sa iyang 25 puntos, gisundan ni Allan Sepe nga adunay 18 puntos.