Memphis mibuntog sa Hawks sa TBA Inter-color

CEBU, Philippines - Gibaraw sa Memphis-Blue Five nga gipangulohan sa ilang power forward Hayes Restauro ang tulo ka sagunson nga daog sa Hawks-Yellow ni Atty. Flor Yosores pinaagi sa pag-iskor og 74-72 nga kadaugan sa Division C sa Talisay-Balik Basketball Association (TBA)-2011 Inter-color basketball tournament didto sa Talisay Sports Complex.

Ang tirada ni Restauro sa katapusang 54 segundos maoy nagbaswat sa Memphis-Blue ngadto sa kadaugan.

Ang Memphis-Blue ug ang Hawks-Yellow parehong nagbitbit og 3-1 win-loss records. 

 Si Restauro miposa og 14 puntos aron pangulohan ang Memphis-Blue, samtang sila si Ed Filisopo ug Manny Tanio nagkumboya og 21 puntos.

 Ang nabuntog nga Hawks gipangulohan sab ni Yosores pinaagi sa iyang 15 puntos. Sila si Mar Sanoy ug Wen Alonzo nagkumboya sab og 21 puntos.

 Sa laing duwa, ang CJ Optical-White ni team owner Randy Gavas mikulit sa ikaduha nilang daog pinaagi sa pagpilde sa Magic-Red, 70-54 .

Nagkumboya og 25 puntos sila si Cardit Echavez ug Dennis Reyes alang sa CJ Optical-White, samtang ang Magic gipangulohan ni Allan Enrile kinsa mibahog og 12 puntos.

Sa Legend Division, nagpabiling walay pilde ang Miami-Red human nila gilubong ang Yokohama-Yellow sa iskor nga 80-51.

Si Rene Cabrera miburak og 27 puntos alang sa maong kadaugan, giabagan sab siya nilang Allan Batatas ug Rocky Damole nga nagkumboya og 26 puntos.

Sila si Danny Cabasa ug Ehing Cañizares maoy nangu sa Yokohama sa ilang 19 ug 16 puntos matag usa.