Tabal, Dueñas nidominar sa 1st Cebu Sonshine Run

CEBU, Philippines - Nabatasan na sa running tandem Mary Joy Tabal ug Philip Dueñas ang pagpangolekta og titulo ug ang labing ulahi sa premier division sa 1st Cebu Sonshine Run niadtong Domingo didto sa The Terraces sa Ayala Center-Cebu.

Ang mga garbo sa Southwestern University (SWU) nga sila si Tabal ug Dueñas maoy ninghawod sa tagsa-tagsa nila ka kategoriya sa 12K Open.

Giila isip bag-ong reyna sa Cebu running scene, si Tabal milabang sa finish line sa oras nga 47:38.31 nga abante kaayo sa nagsunod niya nga si Christy Sevilleno-Tutor nga mi-oras og 50:52.83.

Mi-okupar sa ikatulo mao ang beteranang si Madelyn Carter sa oras nga 52:29.30

Lahi ang senaryo ni Dueñas kay niagi kini og hugot nga kompetisyon sa wala pa niya langkata ang titulo sa men's open. Iyang gitapos ang dagan sud sa oras nga 42:03.76. Nagsunod ang iyang teammate nga si Ian Bernido (42:04.67) ug reigning Milo Marathon regional champion Adonis Singson (42:08.167) nga miangkon sa ikaduha ug ikatulo nga dapit.

Sa 6K men’s category, giangkon ni Jobert Carolino ang unang luna sa oras nga 20:54.55, gisundan ni Sherwin Managil sa ikaduhang dapit sa oras nga 21:11.35 ug Jess Gonzaga sa ikatulo sa oras nga 221:15.80.

Ang top three finishers sa 6K women's class mao sila si Lovely Fe Andrin (26:33.80), Path Torremoro (31:17.31) ug Rejeeli Sumaya (32:27.17).  (BANATSPORTS)