Dapudong gitikasan?

CEBU, Philippines - Misyagit na sab nga biktima sila sa tikas ang kampo ni Braveheart boxer Edrin “The Sting Dapudong” kinsa pakyas sa iyang tahas pag-angkon sa WBA flyweight title batok ni Hernan “Tyson” Marquez kagahapon didto sa Centro de Usos Multiples sa Mexico City.

Si Dapudong napilde pinaagi sa knockout dihang giundang sa referee ang away sa third round human siya mapatumba ni Marquez, apan miklaro nga sayu ra kaayo ang maong stoppage tungod kay kaya pa niya ipadayun ang away.

Nakigsinukliay og kumo si Dapudong ni Marquez sa unang duha ka rounds, apan usa ka bangis nga kombinasyon ang gibuhian sa Mehikano nga mipatumba ni Dapudong.

Gisugdan siya og ihap ni referee Raul Caiz Jr., apan kalit ra usab kini nga mihunong dayung deklarar ni Marquez nga maoy midaog.

Nasagmuyo ang tibuok kampo ni Dapudong tungod kay klaro kaayu nga misinyas pa ang Pinoy boksidor nga mo-away human matumba.

"Hindi ko alam bakit tinigil niya (Caiz)," matud pa ni Dapudong kinsa mipasangil usab kaniadto nga gitikasan atol sa iyang kapakyasan niadtong miaging tuig sa pagdepensa sa iyang WBC silver belt batok sa Mehikanong si Wilbert Uicab didto sa Mexico .

"We can't say we could have won the fight but certainly, the stoppage was premature given the fact that this is a world championship fight. Dapudong was not even hurt or marked," dugang pa sa manager ni Dapudong nga si Manny Pinol sa Philboxing.com. – BANAT NEWS