Azkals misaad og daog

CEBU, Philippines - Naleksiyon ang Philippine Team Azkals sa ngil-ad nilang gipakita sa first leg ug misaad kini og daog sa ilang pakigsangka batok sa bisitang Sri Lanka Red Braves karong hapon didto sa Rizal Memorial Sports Complex sa kaulohan.

Wala na mahibong ang Azkals sa negatibong komento sa pipila ka mga Pinoy football enthusiasts nga wala matagbaw sa gipakita nilang duwa didto sa Sri Lanka

diin pakyas sila pagsakmit og daog ug igo lang nakatabla, 1-all.

Apan ang manager sa Azkals nga si Dan Palami kompiyansa nga dili lang tabla ang buhaton sa Azkals batok sa mga Red Braves.

"We will go for the win and not just the draw," matud pa ni Palami sa Philstar.com.

Gipasalig usab ni Azkals coach Michael Weiss nga lahi nga duwa ang ipakita karon sa iyang mga batos ug makapakita kini'g impresibo nga kadaugan.

Dugang mipalig-on sa pagsalig ni Weiss nga modaog mao ang pagduwa nila sa ilang balwarte nga mas hamugaway itandi sa korte sa Sri Lanka nga maoy iyang gibasol sa ngil-ad nilang duwa atol sa first leg.

Ang Azkals kinahanglan lang og bisan 1-0 nga kadaugan aron segurado ang ilang pag-abante sa sunod nga hugna sa 2014 FIFA World Cup qualifying rounds batok sa Kuwait.

Kagahapon, gipahibalo ni Fil-British striker Phil Younghusband nga moduwa siya karong adlawa bisan pa sa iyang hamstring injury. Si Younghusband wala makaduwa sa second half didto sa Sri Lanka tungod sa injury. (BANATSPORTS)