CEBU, Philippines - Turno na sab karon ni Filipino fighter Edrin 'The Sting' Dapudong sa pagpakita sa iyang taras sa dihang makigsinukliay kini'g kumo batok sa Mehikanong si Hernan 'Tyson' Marquez alang sa WBC flyweight title didto sa Plaza Cindero sa Mexico City.
Si Dapudong nga mitimbang og 110 lbs., mosuway paghimo og upset batok ni Marquez, kinsa mitimbang og 112 lbs. atol sa official weigh-in kagahapon.
Dili sayon ang misyon ni Dapudong tungod kay gawas nga iyang sulngon si Marquez, grabe sab ang kainit sa panahon didto sa Mexico nga miabot og 40 degrees Celsius.
Masaligon si Dapudong nga iyang madala ang kalibotanong titulo sa iyang pag-uli dinhi sa Pilipinas.
Gawas sa damgo nga mahimong world champion, dugang rason ni Dapudong nga modaog batok ni Marquez mao ang pagpanimalos dihang gihuboan siya sa iyang WBC silver belt sa Mehikanong si Wilbert Uicab sa miaging tuig didto sa Mexico. (BANATSPORTS)