Yu mipaundang ni Lopez

CEBU, Philippines - Wala maka-agwanta sa nagbagang mga suntok ni Raul Yu ang kontra niining si Michael Lopez, kinsa napugos pag-undang sa third round atol sa ALA-Summit Natural Drinking Water Fight Night Amateur Series niadtong Biyernes sa gabii didto sa Gaisano Countrymall carpark.

Naglupad dayon ang mga suntok sa Talamban boxer nga si Yu pagsugod sa away hangtod sa ikatulong hugna hinungdan nga nagpunga-punga'g panagang si Lopez sa University of the Visayas (UV) nga nakapaaghat sa referee paghunong sa away, 1:28 sa third round.

Midaog usab ang duha ka boksidor gikan sa Phil-Aust Boxing Club (PABC) nga sila si Richard Rama ug Edu Rosal batok nila ni Marvin Pumar sa Sta Cruz Stable ug Ferdie San Roque sa Cabancalan.

Wala hinuon buligi og suwerte si Reymund Rama sa PABC, kinsa miyukbo ngadto ni Marco Pumar sa Sta Cruz Stable.

Ang teammate ni Lopez nga si Wendel Acharon mikulata ni Rolando Lingaw-Lingaw sa Bukidnon.

Midaog pinaagi sa puntos si Alex Belonguil sa Lapu-Lapu batok ni Deminiciano Mellanis sa Lahug, samtang gibuntog ni Mardy Muaña si John Rey Melligen.

Mikompleto sa lista sa mga midaog mao sila si Dominique Casañares sa Banilad Elementary School, Jose Groyal sa Mabolo Elementary School, Jonathan Francisco sa Consolacion ug Christian Bacolod sa Mabolo National High School. (BANATSPORTS)