CEBU, Philippines - Nag-una si IM Kim Steven Yap paingon sa final round sa Cebu City Masters Chess Championship 2011 sa miaging adlaw didto sa Deep Blue Chess Club sa SM City-Cebu.
Sa pagka karon, si Yap mihipos og 6.0 puntos human gipilde ang Singapore-based chess trainer nga si Eric Gloria ug Richard Natividad sa ikapito ug ikawalong hugna ning lima ka adlaw nga torneyo.
Si IM Enrico Sevillano maoy mi-okupar sa ikaduha nga dapit sa iyang 5.0 puntos.
Mikompleto sa top 10 mao sila si Gloria, Rommel Ganzon, Eden Diano, Richard Natividad, Anthony Makinano, Enriquez, Merben Roque ug Voltaire Sevillano.
Si Yap kinahanglan nga modaog batok ni Rogelio Enriquez aron maangkon ang kampiyonato.
Gawas sa tropeyo, ang kampiyon mobulsa og P10,000, ang second placer makadawat og P5,000, samtang ang third placer makaangkon og P3,000.
Mopahiluna sa ikaupat makadawat og P2,000, samtang makadawat og P1,000 matag usa ang mopahiluna gikan sa ikalima hangtod sa ika-10 nga dapit. (BANATSPORTS)