Congrats, Mandaue-Rdak

CEBU, Philippines - Kagahapon, sayo kaayo akong nakadawat og text message gikan kang Mandaue City vice-mayor Glenn Bercede nga giligsan sa Mandaue Landmasters-RDAK Transport ang tanan nilang kaatbang didto sa General Santos City diin midaog na sab sila sa koroa sa Liga Pipilipinas GenSan leg, ang ikatulo nilang kampiyonato sulod lang sa duha ka buwan.

Unang midaog sa korona ang Mandaue-RDAK Transport ni coach Jun Tan diha sa Cebu Coliseum dihang ilang gipilde ang M. Lhulllier-Cebu Niños alang sa Cebu Leg ug dayon, midaog sila sa ikaduhang korona didto mismo sa ilang balwarte sa Mandaue alang sa Mandaue Leg.

Dako kaayo og kalainan ang karaang team sa Mandaue kung itandi karon sa bag-ong team nga gipaluyohan sa RDAK Transport nga gipanag-iya sa pamilyang King, ang inilang dealer sa mga Chariot jeepneys dinhe sa Sugbo. Wala pa ako maka-ila sa tag-iya nga si Recaredo Delfin Abellana King (RDAK), daan na nakong higala sila si Edwin Camins, ang kanhi team manager sa Chariot ug ingon man usab kang kumpare Julie Flores, ang team coordinator ug coach Titing Manalili dihang sila pa maoy usa sa labing kusog nga team sa MICAA o Mandaue Industrial-Commercial Athletic Association.

Didto sa GenSan Leg, giharus sa RDAK Transport ang tanan nilang kontra — Ilocos Sur, Laguna ug host GenSan Pacman aron langkaton ang ikatulong korona. Kanunay nagbaha didto sa lalawigan sa Cotabato niining mga panahona ilabi na sa pagrumbo didto sa bagyong Falcon. Mao kini karon ang gitawag nga “when it rains, it pours” ug gipahimuslan sa Mandaue-RDAK ang ilang kainit nga hangtod karon wala pa gyuy nakapiog o nakabang-bang.

Ngadto kang Mr. Rec King, Mayor Jonas Cortes, vice mayor Glenn ug coach Jun Tan lakip na ang tanang players ug coaching staff sa Mandaue-RDAK, congratulations kaninyong tanan ug hinaut nga daghan pang tropeyo ang inyong alsahon sa umaabot.

Gikatakdang moabot ang champion team gikan sa GenSan ugmang adlawa ug aduna nay gi-andam nga victory party alang kanila.

* * *

Niadtong Huwebes, Hunyo 23 didto sa Prudential Center sa Newark, New Jersey, laing point guard ang nahimong no.1 draft pick sa National Basketball Association (NBA) ug siya mao si Kyrie Irving, usa sa pambato sa Duke University ug ang Cleveland Cavaliers kinsa maoy nakakuha sa no. 1 draft sa lottery maoy mipili kang Irving isip unang lakang sa pagpalig-on sa team.

Bisan hangtod ngadto sa NBA draft, wala gyud malimti paghisgot ang ngalan ni LeBron James ug dinha nato masukod kung unsa gyud kadako sa kaaligutgot sa taga Cleveland kang James sa iyang pagbiya sa Cavs ug mitapon ngadto sa Miami Heat aron makig-uban kanilang Dwyane Wade ug Chris Bosh sa tinguhang makasakmit og korona sa NBA.

Pila may estorya, gidungog ang pag-ampo sa taga Cleveland ug ang ilang pagpanaway kang James misamot ka-interesado dihang mismo ang mayor sa Cleveland nga si John Kasich misagop sa 2011 NBA champions Dallas Mavericks isip honorary Ohioans.

Si James usa sab ka taga Ohio nga lumad sa Akron. Siya maoy usa sa labing maayong laki nga high school player sa nahisgotang lugar sa Ohio.

Sayon kaayong sabton ni James ang kayugot sa taga Cavs kaniya ilabi na kay nagkasinukliay sila kanhi ug mahait nga pulong tali sa tag-iya sa Cavs nga si Dan Gilbert. Si Gilbert mismo nag-ampo nga higaba-an unta si James ug tungod tingali sa kadaghang nag-ampo, natuman kini nila.

Kagahapon, gitiwasan pa gyud ni kanhi Chicago Bulls star Scottie Pippen dihang iyang gihimakak nga nag-ingon siyang si James mas maayong laki pa kay ni Michael Jordan. Iyang gitataw nga si Jordan gyud alang kaniya ang “the best NBA player” ug dili si LeBron.

Balik sa NBA drafting, si Irving maoy nangu sa tanang draftees. Ang Top 10 picks mao sila si Derrick Williams, Enes Kanter, Jonas Valanciunas, Brandon Knight, Jan Vesely, Jimmer Fridette, Bismack Biyembo, Chris Singleton ug Klay Thompson.

MISCELLANEOUS. Welcome back to Cebu Engr. Junjun Narvasa from Saudi Arabia. Thanks for the chocolates, perfumes and toiletry. He is the husband of my niece Leslie Po. (BANAT)