Red champ sa Cong. Red Durano Basketball Cup

CEBU, Philippines - Nangayo pa og duha ka overtime ang Liloan team una nila mapukan ang defending champion Sogod, 105-103 ug aron sab sakmiton ang korona sa Congressman Red. Durano Basketball Cup niadtong Sabado sa gabii didto sa Danao City Civic Center.

Madepensahan unta sa Sogod ang ilang korona tungod kay naglabaw na sila’g 10 puntos, 49-39 sa third quarter, apan migukod ang Liloan hangtod nga naangkon ang kadaugan.

Si Dave Branzuela sa Sogod team maoy naghatod sa duwa ngadto sa unang overtime pinaagi sa iyang three-pointer.

Nagbanos-banos og iskor ang duha ka kampo sa unang overtime ug sa katapusang 32 segundos, ang UC Junior Webmasters nga si Adamme Talisic mihatag og labaw sa Liloan pinaagi sa iyang lay-up for a 91 – 90.

Sayo unta nga maangkon sa Liloan ang daog dihang nagtabla kini, 91-all, apan si Talisic nasipyat 

sa iyang tirada sa nahabiling segundos hinungdan sa ikaduhang overtime.

Naglabaw ang Sogod sa second overtime, 103–99 sa katapusang 50 segundos, apan nakapasulod og duha ka free throws si Paul Desiderio aron mosikit ang Liloan, 101–103 sa nahabiling 35 segundos. Napun-an kini sa three-pointer ni Josephus Laboc aron hatagan ang Liloan og uno punto nga labaw, 104-103 sa katapusang 22 segundos.

Sa maong kadaugan, ang Liloan mibulsa og P50,000 ug balor usa ka milyon nga proyekto, samtang ang Sogod mipauli dala ang P30,000 ug balor nga P500,000 nga proyekto.

Si Desiderio maoy napiling Most Valuable Player ug maoy nangu sa Mythical Team uban nilang Ricardo Oliva, Allan Dimco sa Carmen, Meca sa Danao City ug Richcres Nwanaka sa Sogod. (BANAT NEWS)