MANILA, Philippines - Napanatili ng Quezon City ang kanilang malinis na kartada, habang pinalakas naman ng Taguig ang kanilang kampanya para sa playoffs kung saan patungo na sa krusyal stage ang inter-zonal phase ng 2nd Coca-Cola Hoopla National Capital Region Championship nitong Sabado.
Hiniya ng QC ang Mandaluyong, 99-90 sa Mandaluyong City gym, habang giniba naman ng Taguig ang Caloocan, 75-71 sa C.P. Tinga Gym sa Taguig.
Mula sa 77-76 pagkakalapit ng iskor, nagpasabog ang Quezon City, ilang beses lumayo ng 10 puntos, nang 9-2 run upang tuluyang iwanan ang kalaban.
“We had to labor to get this one,” ani QC coach Rene Baena.“Mandaluyong gave us a lot of problem.”
Kailangan na lamang ng Quezon City na talunin ang pumapangalawang Antipolo sa final day ng semis upang pormal na makopo ang No. 1 spot at twice-to-beat advantage sa playoff.
At sa nalalabi nilang isang laro bago ang playoffs, pinangunahan ng Quezon City ang limang koponan sa semis taglay ang malinis na 3-0 win-loss slate, sumunod ang Antipolo (2-1), Mandaluyong at Taguig (1-2) at Caloocan 1-3.