Cebu tennis squad ipadala sa 17th SAJTTC

CEBU, Philippines -  Sa labing unang higayon, ang all-Cebu table tennis men's squad maoy morepresentar sa Pilipinas sa 17th Southeast Asian Junior Table Tennis Championships nga gikatakda karong Hunyo 22-26 didto sa Vietnam.

Ang head coach sa University of Cebu (UC) nga si Jessica Jawad-Honoridez, nagkanayon nga sa nangaging mga katuigan, kanunay mag-uban ang mga atleta gikan sa nagkalain-laing bahin sa nasud, apan ning higayona, ang Table Tennis Association of the Philippines (TATAP) miduso nga mopadala og solidong Cebu line-up alang sa torneyo.

Lab-as pa gikan sa bronze medal finish sa 2nd Philippine International Table Tennis Championship didto sa Manila, si Dannel Jay Tormis maoy mangulo sa nasudnong koponan uban ni Jean Phillippe Honoridez, Val Stephen Jaca, Jann Mari Nayre ug John Paul Christopher Ba-ay.

Dili kini bag-o nilang Tormis, Honoridez ug Jaca nga moduwa og international competitions. Sila si Tormis ug Honoridez niduwa na sa International Children's Games sa San Francisco, California ug sa Southeast Asian Junior Table Tennis Championship sa Thailand, samtang si Jaca nipakita'g aksiyon sa 1st Asian Youth Games sa Singapore.

Ang mga atleta gipili sa TATAP basi sa ilang impresibong labok sa bag-o lang natapos nga Philippine National Games (PNG) didto sa Bacolod ug sa Palarong Pambansa sa Dapitan City, Zamboanga del Norte duha ka semana ang nilabay.

Mopakita sila sa ilang katakus sa 15-under ug sa 18-under categories. (BANAT NEWS)