Lisud gyud kalimtan sa mga Pinoy ang basketbol tungod kay nakagamot na kini'g maayo bisan pa man sa nakita natong inanay nga pagkagusto nato sa duwa nga soccer nga nabuhi'g balik tungod sa Team Azkals ug ang walay kamatayong boksing tungod usab ni Manny Pacquiao.
Wala man tuod kita'y full-blooded Filipino basketball player sa National Basketball Association (NBA) sa US, pero grabe kitang makasuporta sa matag koponan ug ning panahona ang Miami Heat ug ang Dallas Mavericks nga nag-abot sa finals.
Abi ninyo mga tirador, usa sa akong nabantayan... mao ni, dali dayon kitang mohatag sa atong suporta sa usa ka koponan nga adunay bisan gamay’ng pagkadugo nga Pinoy kun sa international arena na maoy hisgutan.
Sama sa Miami Heat, Fil-Am man nang ilang coach nga si Erik Spoelstra, ang akong mga amigong pro-Dallas mibali karon nga finals kay lagi daw Pinoy man ang coach. Hehehehe.
* * *
Kun sa basketball gani mosuporta ta bisan ‘katunga’ Pinoy, ahay mas maayo kun ang atong produkto usab atong suportahan imbes nga sige ta'g palit og imported nga mga gamit ilabi na karong tingpalit sa school supplies.
Kamong mga ginikanan gihangyo nako nga palita (kun duna lang) ang atong kaugalingong produkto kanang duna gyu'y tatak nga "Made in the Philippines" sa pagpalit ninyo og school supplies.
Kini aron matabangan nato atong ekonomiya ug mo-survive ang mga lokal natong kompaniya nga nagpatrabaho sa liboan natong mga kababayan, at the same time, ang halin, buhis anhi lang sa ato.
Kay kun mopalit ta'g imported ilabi na ang mga "Made in China," nga pagkakuyaw kay substandard ug delikado ang materyales nga gigamit, gibutang nato sa peligro ang atong mga anak.
Duna saY DAKUNG epekto sa atong ekonomiya kay ang masingil sa gobiyerno tax ra gyud (kini kun dili ipaagi sa – smugglers), unya ang halin ila i-convert sa dollars or Chinese Yuan aron ikompra nila didto og stocks nga dad-on dinhi ug magbalik-balik ni nga cycle. Ang resulta puno ta’g basura gikan sa China ug nahurot atong kwarta.
Mao bitaw nga nalupigan na nila ang Western countries sa ekonomiya karon tungod sa maong taktika. Apan sa ilang nasud dili sila mopalit sa "Made in the Philippines" tungod kay estrikto man nilang gisunod ang ilang "buy our own products" ug mahimo nilang kontrolon ang gidaghanon sa ilang imports gikan sa atua.
Nagsugod sila sa pagpamirata sa mga produkto nga kaniadto pa gikan sa lapis, screw, lansang, papel, paper clips, bala sa staplers hangtod sa halos tanang gamitonon sa tawo.
Ang kaniadto inintsik nga labels ilahang gi-translate sa Iningles pero kun imo basahon nagkabalintong-buliskad ang Iningles. Hangtod nga ilang naperpekto ang pagpangopya ug nahimo nang household name ang "Made in China" nga mga produkto dinhi sa ato.
Tinuod nakapatrabaho na sila sa pipila nato nga kababayan sa ilang mga tindahan pero sakto ba ang sweldo? Duna bay benepisyo? Health care? Insurances ug uban pa?
* * *
Adunay Regional New Face Championship ang Philippine Taekwondo Association (PTA) karong adlawa sugod sa alas-8 sa buntag diha sa Cebu City Sports Center gym. Good luck to my son Zion Alexander Melecio.
* * *
HAPPY BIRTHDAY to our brother Bong Millanes who celebrated his birthday yesterday. And advance HAPPY SILVER WEDDING ANNIVERSARY to Froilan and Lilibeth Ramas of Houston, Texas USA.
* * *
PAGTULON-AN: Ang kalamboan dili binuhatan sa mga tawong may katagbawan.
* * *