Cebu Sonshire Run gitakda

CEBU, Philippines -  Ang DYAR 765 Sonshine Radio mopasiugda sa ilang 1st Cebu Sonshine Run karong Hulyo 3 diha sa Terraces grounds sa Ayala Center-Cebu.

 Ang lumba nga ipahaom sa ikalimang anibersaryo sa DYAR (kanhi Angel Radio sa NBC) nga ubos na karon sa Swara Sug Media Corporation, laraw nga makapundo og kuwarta aron idonar ngadto sa Children's Joy Foundation  Inc. sa Nasipit, Talamban ug ingon man pagpakaon ngadto sa mga kabus ug malnourished nga mga bata. Gawas pa niini, tuyo sab sa kalihukan nga makahatag og libreng mga school supplies sa mga kabus nga mga estudyante.

"Dahil sa running boom dito sa Cebu, nakita namin tong kaparaanan na matulungan ang mga bata na nangangailangan. Also organizing a Fun Run is suitable for our radio station that IS always campaigning to our listeners for a healthy living," matud pa ni Cherryl A. Ilaw, station manager sa DYAR 765 Sonshine Radio atol sa press conference kagahapon didto sa Golden Cowries sa Brgy. Lahug.

Ang lumba naglatid og 3K, 6K ug 12K categories.

Ang 3K run alang sa mga partisipante nga nag-edad og 12-anyos ug paubos, hinuon, ang fun runners nga nilapas na sa gitakda nga edad mao gihapon nga modagan sa maong dibisyon.

Si William Valencia sa DYAR, naglaum nga moabot ngadto sa 1,000 runners ang mosalmot lakip na ang nagkalain-laing running clubs ug mga kawani gikan sa   higanteng mga kompaniya sa MEPZ.

Ang labing dominanteng female runner sa Sugbu karon nga si Mary Joy Tabal ug ang iyang training partner nga si Philip Dueñas ang nakapalista na alang sa maong lumba.

Mokabat ngadto P30,000 nga ganting salapi ang gitaganan alang sa top finishers ug ingon man Timex watches ug usa ka tinuyong pinabuhat nga mga medalya kortesiya sa Suarez and Sons.

Ang registration fee nagkantidad og P250 sa 6K ug 3K, samtang P350 sa 12K.

Mahimong magparehistro sa RUNNR ug ROX sa Ayala Active Zone, Colombia sa SM-Cebu North Wing, Holiday Gym and Spa ug Philippine Sports Commission office.  (BANATSPORTS)