CEBU, Philippines - Unang matang nga basketbol aksiyon ang masaksihan sa Cordova tungod kay magtakus karong gabii ang Salazar College of Science and Institute of Technology (SCSIT) Skyblazers ug ang Ave Maria Sanctuary Park alang sa korona sa 1st MKLP-CBA basketball tournament didto sa Cordova gym, Lapu-Lapu City.
Nagtabla karon ang "best-of-three" series tali sa Skyblazers ug Ave Maria sa 1-1 nga baraha ug ang modaog karon makabulsa og P200,000 nga ganting salapi.
Unang midaog ang Ave Maria, 83-79 niadtong Mayo 30, apan mibawos ang Skyblazers sa Game-2 pinaagi sa pag-iskor og 88-70 nga kadaugan sa miaging adlaw.
Sa deciding Game-3, gikahinaman nang daan ang ilang sangka tungod kay pareho nilang tinguha ang paglangkat sa korona.
Ang Skyblazers, kinsa maoy topseed sa elimination, mosalig nilang Stephen Padilla, Mark Abadia ug 6-foot-8 center ug kanhi UV Lancer nga si Rino Berame.
Sa habig sa Ave Maria, lakip sa ilang sinaligan mao sila si Danny Aying, Alex Cainglet, Aldin Ocañada ug Ope Abellana.
Gilauman sab nga motampo sa USJ-R Jaguars cagers nga sila si Armand Ponce, Manny Gabas, Jabe Delfino ug Kurt Amores alang sa Ave Maria. (BANATSPORTS)