ABAP magpaboksing matag buwan

CEBU, Philippines -  Gilauman nga mosulbong na sab ang amateur boxing dinhi sa Sugbu atol unya sa pagpahigayon og boxing promotions kaduha matag buwan aron pagtabang sa grassroots level ug ingon man pagkaplag og usa ka Olympic gold medalist ugma damlag.

Ang gikatakdang boxing promotion pasiugdahan sa Amateur Boxing Association of the Philippines (ABAP) ubos ni Cebu Chapter president ug commissioner sa Cebu City Sports Commission (CCSC) Lorenzo 'Chao' Sy, sugdan karong Hunyo 18 diha sa City Hall Plaza   atubangan sa Cebu City Hall.

Matud pa ni Sy, nga ang labing daku nilang ikatabang sa amateur boxing sa nasud mao ang pagpahigayon og mga boxing promotions nga sugdan sa mga gagmay’ng barangay tungod kay mao kini bugtong paagi nga makakaplag unya ang Pilipinas og maayong laking boksidor nga maoy modaog sa labing unang Olympic gold medal nga wala pa sukad makab-ot sa atong nasud gikan pa sa dekada 50.

Matag promotion, adunay 12 ka amateur boxing bouts sugod sa alas 4 sa hapon.

Ang mga boksidor nga mosalmot sa torneyo ibutang sab ngadto sa ABAP-Cebu training pool. 

Atol sa Hunyo 18 nga boxing promotion, ipahigayon sab ang induction sa ABAP-Cebu Chapter officer diha sa Hotel Fortuna sa alas-8 sa gabii.

Si ABAP director Ed Pecson gidapit nga maoy inducting officer. (BANATSPORTS)