CEBU, Philippines - Makasaksi na sab og sinukliay sa kumo ang molupyo sa San Remigio sa dihang ang ALA Promotions modalit og boxing event nga uloha'g "Championship Fight sa San Remigio" karong gabii didto sa sports complex sa maong lungsod.
Kini ang unang higayon nga ang lungsod sa San Remigio ni Mayor Jay Olivar mo-host og title fight uban ni Gerson Mancio sa Agusan del Sur nga makigbinukbukay batok ni Jason Canoy sa Omega Boxing Stable alang sa bakanteng Philippine junior flyweight belt.
Laraw ni Mancio (12-1, 5KOs) nga mokulit sa ikatulo niyang sunod-sunod nga daog, apan dili sayon ang iyang misyon tungod kay atubangon niya ang walay pildeng si Canoy (9-0, 6KOs)
Sa supporting bout, ang Mandauehanon nga si Welbeth Loberanis makigsinukliay og kumo batok ni Don King Tampus sa Tony Dacer Stable sa Davao City sa 8th rounder fight.
Mokatkat sa ring ang labing makalingaw nga boksidor sa nasud nga si Jun 'Flash' Intor sa ALA Gym batok ni Cris Leon sa Bukidnon. (BANATSPORTS)