Puwesto sa quarters nakataya sa labanan ng Gems, Sumos

MANILA, Philippines - Rambulan para sa awtomatikong puwesto sa quarterfinals ang paglalabanan ng Cebuana Lhuillier at Max Bond Super Glue sa pagpapatuloy ng PBA D-League Foundation Cup ngayon sa Trinity University Gym.

Tampok na laro ang na­­­sabing sagupaan matapos mag­pang-abot ang Café France at Junior Powerade sa ganap na alas-2 ng hapon.

Momentum patungo sa kanilang knockout game ang hangad lamang ng Scorpions at Tigers sa unang sagupaan dahil ang dalawang ito ang siya ring maglalaban upang madetermina kung sino ang ika­anim at huling koponan na uusad sa Playoffs sa Group B.

Mas masidhi ang pag­ha­hangad sa panalo ng Café France dahil sila na lamang sa hanay ng 13 ko­ponan ang hindi pa na­ka­katikim ng panalo sa tor­neo.

Hitik sa aksyon ang ina­asahang magaganap sa pagitan ng Gems at Sumos na parehong may 3-1 karta at nasa ikalawang puwesto.

Ang mananalo ay sasalo sa nagsosolong Cobra Energy Drink (4-1) at lalapit sa isang hakbang upang makopo ang insentibong ibibigay sa mangungunang dalawang koponan sa Group A at B.

Mas bata ang Sumos dahil karamihan sa kani­la ay naglalaro pa sa UST pero matibay ang mga be­teranong kinuha sa katauhan nina Rudy Lingga­nay, Jun Cabatu at Roel Hug­natan na sariwa naman sa paglalaro sa natapos ng ASEAN Basketball League.

Kasama pa ni Reil Cervantes, ang Sumos ay may tatlong sunod na panalo upang mapawi ang tinamong 61-82 kabiguan sa Maynilad sa unang laban.

Ang mga ex-PBA pla­yers na sina Marvin Hayes at James Sena ang inaasahang mangunguna sa Gems pero makakatulong kung kikinang uli ang batang si Kevin Alas para magkaroon ng ibang opsyon ang koponan.