Allyn Farms gibahaan sa Water Market

CEBU, Philippines - Sa kataposan, midaog na gyud ang Water Market sulod sa labing unang higayon sulod sa lima ka duwa human ilang gipabahaan ang Allyn Farms sa iskor, 97-80 atol sa pagtapos sa first round sa nagpadayong Power Forty Commissioner’s Cup kaniadtong Martes didto sa Inayawan Sports Complex.

Sa laing duwa, mikulit sab og laing daog ang UTASSCO human ilang gipatapsingan ang FC Fortune sa iskor, 100-99 nga maoy labing sikit nga resulta human sa miaging lima ka duwa.

Sa kasamtangan, ang Van System maoy nag-una sa team standings sa ilang 4-1 nga baraha.

Sila si CESAFI referee Edwin Dejacto ug Alan dela Rama parehong mibahug og 17 puntos matag usa aron pangulohan ang opensa sa Water Market kinsa taud-taud gyung wala makatilaw og daog. Bisan pa og naka-uno gyud sila, nahimutang lang gihapon sila sa kinaubsan sa ilang 1-4 nga baraha.

Sila si Tony Ungria ug Jun Nacional midugang sab og double figures alang sa Water Market pinaagi sa ilang 15 ug 14 puntos matag usa.

Si Joel Cañete miwadwad og 31 puntos alang sa 3-2 nga Allyn Farms samtang si Adot Tabar miburak og 23 puntos.

Sa laing bahin, mibahug og 21 puntos si Wilbor Cabrera aron pangulohan ang UTASSCO kinsa mi-abante ngadto sa ikaduhang pwesto. Sila si Atty. Flor Yosores ug Jun Tantay parehong miamot og 15 puntos matag usa.

Ang FC Fortune gipangulohan nilang referee Melvin Caumeran, Nestor Javierto ug Teddy Ebrado kinsa pulos mihakot og 20 puntos matag usa ug ang tanang unom ka players sa maong team nga mi-iskor, pulos nakahimo’g double figures.

Puntos matag usa:

First Game:

Water Market (97)— Dejacto 17, Dela Rama 17, Ungria 15, Nacional 14, Dayota 9, Labajo 6, Abellana 3, Dumale 2

Allyn Farms (80)— Cañete 31, Tabar 23, Moniva 10, Cañedo 4, Sandal 4, Lisondra 3, Vernaiz 1

Second Game:

UTASSCO (100)— Cabrera 21, F. Yosores 15, Tantay 15, Bughao 12, Lalican 6, Yu 5, Atillo 4, Yosores 2

FC Fortune (99)—Caumeran 20, Javierto 20, Ebrado 20, Mosqueda 18, Piezas 17, Kalinga 10.  - BANAT NEWS