Mayol away sa undercard sa Pacquiao-Mosley fight

CEBU, Philippines - Sa dili pa moaway si eight-division world champion Manny Pacquiao nga modepensa sa iyang WBO welterweight title batok ni Shane Mosley, ang kanhi WBC light flyweight champion nga si Rodel 'Batang Mandaue' Mayol nangahas nga mohimo og maayong impresyon ngadto sa boxing fans sa tibuok kalibotan sa dihang makigsinukliay kini'g kumo   batok ni Javier Gallo sa undercard sa Pacquiao-Mosley megafight karong adlawa (oras sa Pilipinas) didto sa MGM Grand Garden Arena sa Las Vegas, Nevada.

Bisan og usa lang kini ka non-title fight, importante gihapon kini alang ni Mayol gumikan kay ang Sugbuanong boksidor gitakda man nga moaway sa Thai fighter Wisano Kokeitgym alang sa WBA interim 108-pound crown karong Hulyo.

Human mapakyas sa iyang kampanya alang sa world title sa makatulo ka higayon, ang 29-anyos daw gibuligan og maayong kapalaran dihang mi-iskor kini og second round knockout batok ni Edgar Sosa aron malangkat ang WBC light flyweight crown niadtong Nobiyembre 21, 2009 didto sa Palengue de la Feria sa Chiapoas, Mexico.

Wala hinuon magdugay ang paghari ni Mayol dihang napildi kini pinaagi sa unanimous decision ngadto ni Omar Niño Romero niadtong Hunyo 19, 2010 didto gihapon sa Mexico.

Isip undercard sa Pacquiao-Mosley showdown, higayon na kini ni Mayol nga ipakita niya sa tibuok kalibotan nga angayan pa gihapon siyang mahimong world-title holder.

Si Mayol nagbitbit og 27-5-2 win-loss-draw record uban ang 21KOs, samtang si Gallo nagtangag og 17-3-1 card uban ang 9KOs. (BANAT NEWS)