Pulpogan Palarong Pambarangay 2011pormal na nga buksan karong adlawa

CEBU, Philippines -  Pormal na buksan ang gipaabot nga Pulpogan Palarong Pambarangay 2011 karong adlawa didto sa MIV open gym sa Pulpogan, Consolacion, Cebu.

Ang kalihukan sugdan pinaagi sa parada sa alas-9 sa buntag gikan sa District 1 ngadto sa District 7 sa naasoy'ng barangay.

Isunod dayon ang programa diin si Brgy. Capt. Roger R. Linaboc mohatag sa iyang mahinungdanon nga mensahe ngadto sa mga partisipante.

Gipaabot sab nga motambong sa opening ceremonies si Consolacion Mayor Teresa P. Alegado.

Pito ka teams (district) sa matag kategoriya ang mag-ilog alang sa garbo ug dungog ning tinuig nga kompetisyon.

Ang mga kategoriya naglakip sa 12-year under, 13-14 years old, 18-35 years old ug 36-above Erpat league.

Ang liga mosubay og double elimination format diin ang top 4 moabante sa semifinal. Ang winners sa semis magsangka sa kampiyonato, samtang mag-ilog sa ikatulong dapit ang mga pildero.

Ang Palarong Pambarangay gipaluyohan sa Sangguniang Barangay sa Pulpogan ubos sa liderato ni Brgy. Capt. Roger R. Linaboc ug sa Sangguniang Kabataan (SK) sa pagpangulo sa ilang chairman Christal Kate I. Goc-ong.

Si konsehal Ed Winston Retardo maoy milingkod isip commissioner ug abagan kini nilang Jerry Narandan ug Edmund Bugtai.

Ang kompetisyon usa sa mga kalihukan sa kapistahan sa ilang mahal nga patrona Inahan sa Kanunay'ng Panabang nga saulogon sa katapusang Domingo sa bulan sa Hunyo.  (BANATSPORTS)