CV andam na sa Palarong Pambansa
CEBU, Philippines - Nangahas ang koponan sa Central Visayas nga palabwan pa ang ilang fourth place finish sa miaging tuig sa pagsikad sa 2011 Palarong Pambansa nga buksan ugma didto sa Dapitan City ug Zamboanga del Norte.
Si Physical Education and School Sports (PESS) assistant supervisor Danilo Villadolid nagkanayon nga ang Central Visayas, diin katunga niini gikan sa Cebu City, andam na aron mohakot og mga bulawang medalya sa Palaro.
Gawas sa sayong pagpahigayon sa Central Visayas Regional Athletic Association (CVIRAA), diin gihashasan ang mga moduwa alang sa Region VII, ang Department of Education (DepEd) Region-7 nihimo usab og training pools alang sa ilang mga atleta.
Sa laing bahin, giseguro sa mga organizers ug lokal nga kagamhanan sa Dapitan ug Zamboanga del Norte ang seguridad sa mga atleta nga moduwa sa usa ka semana nga sporting event.
Kapin sa 10,000 ka mga atleta, officials ug mga bisita gikan sa tibuok nasud ang moabot alang sa labing dakung sports event sa nasud nga pagabidahan sa mga tinun-an sa elementarya ug sekondarya. (BANATSPORTS)
- Latest
- Trending
