Gaisano Capital napilde na gyud

CEBU, Philippines -  Sa katapusan, ang Lion Tiger Aerosol nga gilangkuban sa UV Lancers nakabawos na gyud ngadto sa idlas nga Gaisano Capital human mo-iskor og 75-70 nga kadaugan niadtong Huwebes sa gabii sa 5th CESAFI Partners' Cup didto sa Cebu Coliseum.

Bisan og mas dehado sila sa ilawom, wala magpalupig si Edrian Lao ug nakigtakos sa 6-foot-9 Junemar Fajardo ilabi na kay gidibuynas siya sa iyang perimeter shooting.

Si Fajardo miposa og 18 puntos aron pangulohan   ang Lion Tiger, ang unang koponan nga nakabuntog sa Gaisano human masugdi ang liga niadtong Abril 2.

Ang beteranong point guard nga si Harold Cincoflores ug si Francisco Arong nakatabang sab og daku sa opensa nga parehong miduslit og 11 puntos alang sa Lion Tiger nga adunay 8-2 nga baraha.

Ang Lion Tiger   maoy midominar sa unang duha ka kuwarter ug niposte kini'g 36-28 sa halftime. 

Si Robinson Mohammad nga mihipos og 18 puntos maoy nangulo sa Gaisano Capital, samtang si Fajardo igo lang mi-iskor og 11 puntos. Sila si Roger Pogoy ug Roger Caytuna nagkumboya og 21 puntos alang sa 7-1 nga Gaisano Capital.

Tuyo karon sa Gaisano mobangon sa dihang ilang sangkaon ang Winner Beef Loaf nga ilang napilde sa first round.  (BANATSPORTS)