Cebu Niños sulngon sa Petron Blazers

CEBU, Philippines -  Kulbahinam ug puno sa aksiyon masaksihan sa Sugbuanon nga hilig og basket sa exhibition game tali sa Petron Blazers (kanhi San Miguel Beermen) ug multi-titled M. Lhuillier Kwarta Padala-Cebu Niños karong Mayo 14 diha sa Cebu Coliseum.

Human sa makauuwaw nga 2-7 record sa PBA Commissioner’s Cup nga nagtukmod nila ngadto sa kinailawmang bahin sa standing, ang Blazers tinguha nga mobawi ug unang lakang nga ilang nakita mao ang pagkulit og daog sa numero unong commercial team sa nasud.

Giisip sa Blazers ni coach Ato Agustin nga lakip sa ilang pagpangandam ang pagduwa nila batok sa Niños alang sa nagsingabot nilang kampanya sa 2011 Governor’s Cup.

Malaumon si Agustin ning higayona nga mopakita na sa ilang abilidad ang tulo ka top picks nga sila si Rabeh Al Hussaini, Noy Baclao ug Rey Guevarra nga ilang gikuha bugti sa ilang mga kanhi sinaligan nga sila si Dondon Hontiveros, Danny Seigle, Dorian Peña ug Paul Artadi.

Uban sa Blazers mao ang two-time MVP nga si Danny Ildefonso, Arwind Santos, Jay Washington, Alex Cabagnot, Lordy Tugade, Mick Pennisi, Joseph Yeo, Dennis Miranda, Sunday Salvacion ug Paolo Hubalde. 

Sa ilang bahin, ang M. Lhuillier, kinsa bag-o lang nikampiyon sa Ilocos leg sa SMC Liga Pilipinas Conference V moparada usab sa bag-o nilang line-up.

Ang Niños ni coach Raul 'Yayoy' Alcoseba bidahan sa mga beterano sama nilang Stephen Padilla, Bruce Dacia, Mark Ababon, Frank Nailon ug Felix Belano. 

Mosuporta sab nila sila si Abby Santos, Nat Cruz, Ian Saladaga, Angelus Raymundo, Jayford Rodriguez, Mark Abadia ug rookie Ferdinand Lusdoc.  (BANATSPORTS)