CRV, Vikings abante sa semis

CEBU, Philippines - Mi-abante na sa semifinals ang CRV ug ang Vikings human ilang gitagak ang ilang tagsa-tagsa ka kaatbang sa wildcard round sa 3rd F. Llamas Youth Association (FYA) basketball tournament didto sa sitio Manggahan open court sa barangay Punta Princesa.

Sa unang duwa, ang CRV naka-eskapo gikan sa mga kamot sa defending champion Simpolang Barbecue Haus bitbit ang 109-106 nga kadaugan pinaagi sa overtime, samtang ang Vikings milubong sa OMKI Megavolts sa iskor nga 90-65.

Sa semifinals, ang Vikings makigsangka batok sa topseed ANKLA, samtang ang CRV makigtakos sa Habagat diin ang mga modaog maoy mag-abot sa finals ug ang mapilde maoy mag-ilog alang sa ikatulong puwesto.

Si Dexter Caballero maoy nagmangtas sa CRV kinsa miratsada og 44 puntos, gisundan ni Ranel Patalita nga adunay 16 puntos, samtang sila si Michael Garcia ug Ago Estella parehong mihipos og 15 puntos.

Si Ryan Villaver maoy nangu sa Simpolang sa iyang 26 puntos ug ang ex-USJR Jaguar nga si Giovanni Canceko midugang og 24 puntos. Si playing coach Noel Medalle miamot og 18 puntos.

Sa laing bahin, lima ka players sa Vikings ang mi-iskor og kapin 10 puntos sa pagpangulo ni Dondon Cadungog sa iyang 14 puntos.

Si Glen Gemperoa maoy nangu sa OMKI sa iyang 18 puntos.

PUNTOS MATAG USA

Unang duwa:

CRV (109) - Caballero 44, Patalita 16, Estella 15, Garcia 15, Tomada 7, Cañete 6, Dacayana 2, Tabasa 2

Simpolang (106) - Villaver 26, G. Canceko 24, Medalle 18, Trinidad 11, Ramoneda 9, Laurente 9, abella 6, J. Canceko 2

Ikaduhang duwa:

Vikings (90) - Cadungog 14, Basalo 13, Sydiongco 13, Canseco 12, Baldago 11, Trinidad 7, Lañojan 6, Medalle 4, Cal 4, Pacaña 2, Avila 2

OMKI (65) - Gemperoa 18, Reubal 15, Jakosalem 11, Robert 9, Atillo 4, Labrador 3, Abella 3, Codilla 2 (BANAT NEWS)