Boom Boom-Cuete "rematch"

CEBU, Philippines -  Dili matugkad ang kahinam ni ALA Gym superstar Rey 'Boom Boom' Bautista karon nga nagkaduol na ang dugay na niyang gidamgo nga "rematch" batok ni Heriberto 'Cuete' Ruiz.

Human sa tulo ka tuig nga puno sa kasakit ug kapakyasan miabot na ang gipaabot ni Bautista nga mobawos ngadto ni Ruiz sa ilang sangka sa main event sa "Pinoy Pride 6: Grudge Rematch: karong Hunyo 11 diha sa Waterfront-Cebu City Hotel and Casino.

Atol sa news conference kagahapon didto sa Diamond Hotel Suites and Residence, wala matago ni Michael Aldeguer ang iyang pagmaya sa pagkatuman sa dugay na niyang gipaabot nga mega boxing fight.

"This is the fight that everyone is waiting for," matud pa ni Aldeguer. "It took us almost a year in negotiating with the camp of Ruiz and we are happy to offer this fight that could be one of the biggest fight happening this year in the Philippines."

Si Ruiz, 33-anyos, maoy ikaduhang boksidor nga mipilde ni Bautista   pinaagi sa unanimous decision niadtong tuig 2008.

Apan ang garbo sa Candijay-Bohol wala mosaludo sa kadaugan ni Ruiz. Matud pa ni Bautista nga suwerte lang si Ruiz sa maong away kay dili siyento porsiyento ang iyang kusog tungod sa injury sa iyang walang kamot.

"Tan-aw gani nako nga mas sayon pa siya ni (Alejandro) Barrera," matud ni Bautista. "Dili man kusog iyang kumo suwerte lang siya kay sakit ako kamot unya gulang pud siya kay mogamit og head-butt ug gi-low blow ko niya."

Gawas sa iyang kauhaw sa away, dugang inspirasyon ni Bautista nga modaog mao ang IBF International featherweight title nga maoy ilang ilogan.

Sa supporting bout, ang 19-anyos   light welterweight star Jason Pagara moladlad na usab sa iyang abilidad batok ni Puerto Rican knockout artist Javier 'Sote' Monserrate.

Ang pambato sa Braveheart Boxing stable nga si Edrin 'Sting' Dapudong nga gitanyagan og multi-year contract sa ALA Promotions moharong batok sa Indonesian interim flyweight champion nga si Benja 'Rhinoceros' Loemoli.  (BANATSPORTS)