Sevilleno, Bacong daog sa 1st Bantayan Beachathon

CEBU, Philippines - Gawas sa pagbakasyon panahon sa Semana Santa, may laing tumong ang veteran runner nga si Christy Sevilleno Tutor sa iyang pagbalik sa iyang yutang natawhan sa Isla sa Bantayan ug kini mao ang pag-angkon sa women’s title sa 1st Bantayan Beachathon didto sa Sugar beach.

Gipahimuslan ni Sevilleno-Tutor ang iyang kahanas sa rota aron makuha ang unang dapit sa 5K run sa oras nga 17:35.18 batok nila ni Alyssa Lagahit (17:46.78) ug Merlita Arias Dunkin (18:46.32) nga maoy second ug third placers.

Samtang ang men’s class, gidominar kini ni Jordan Bacong   human niya gihuman ang dagan sa oras nga 14:20.

Sila si Noel Tillor (14:29.06) ug Ian Bernido sa Southwestern University (14:29.64) miangkon sa ikaduha ug ikatulong dapit.

Sa grass skirt category, si Andrew Canonigo mao ang nikampiyon sa oras nga 19:15.07 uban sa iyang mga runners-up nga sila si Padrino Tugdong (21:47.62) ug Jesson Cuyos (22:22.94).

Ang pamilyang Flores -- Dave Christopher, John Cristopher ug Ireneo mao ang nidaog sa family category sa oras nga 23:35.36.   - BANAT NEWS