CEBU, Philippines - Sa katapusan, nakatilaw na gyud og daog ang Rose Aquarius Merchandising pinaagi sa pagpilde sa Winner Beef Loaf, 89-75 sa 5th CESAFI Partners' Cup basketball tournament kagahapon didto sa Cebu Coliseum.
Diriyot unta mawagtang sa walay hinungdan ang 20 puntos nga labaw sa Rose Aquarius dihang mi-rally ang Winner Beef Loaf sa nanghinapos nga bahin sa duwa, apan nasuwertihan pa kini human makarekober.
Ning pagsuwat, padayon pang nagtakus ang San Marino Corned Tuna (2-3) ug ang Ave Maria Sanctuary Park (1-3) nga parehong naninguha nga moinat ang ilang rekord.
Naglawig na sa tataw nga kadaugan ang Rose dihang miposte sila’g 20 puntos nga abante, 78-58 sa nahabiling 4:42 ang oras, apan nakuratan sila sa kinalit nga hugot nga depensa sa Winner, kinsa dali kaayong mipabuhagay og 9-0 run aron matibhangan ang ilang biya ngadto na lang sa 11 puntos, 67-78 human sa basket ni Allan Dimco sa nahabiling 3:40.
Nakahigayon sab hinuon og bawos ang Rose ug giayo na nilang pagpahimutang ang ilang opensa bisan pa og na-outscored sila sa Winnner, 11-17 sulod sa kapin kuwatro minutos sa fourth quarter.
Nag-igo og maayo si Fritz Dajalos ug mihipos og 18 aron pangulohan ang Rose, kinsa nakigtabla sa Winner sa managsamang 1-4 nga baraha. Napugngan sa Rose ang usa sa leading scorer sa Winner nga si Chester Curso, kinsa igo lang mihimo’g sayes puntos, ang tres puntos niini pulos gikan sa free throws sa fourth period.
PUNTOS MATAG USA
Rose Aquarius (89) - Dajalos 18, E. Ferraren 15, J. Ferraren 9, Meca 8, Linao 8, Genobia 7, Maraño 4, Sedurifa 4, Avila 4, Corcilles 4, Nudalo 2, Cabahug 2, Sollano 2, Misa 2
Winner Beef Loaf (75) - Taboada 17, Batiquin 16, Castro 13, Dimco 10, Lopez 8, Curso 6, Brigoli 3, Del Mar 2 (BANAT NEWS)