UTASSCO mitiklo sa Water Market

CEBU, Philippines - Gipahamtangan sa UTASSCO Utility ni Atty. Flor Yosores ang Water Market sa ikatulo nilang sunod-sunod nga pilde 101-94 , samtang midaog sab ang FC Fortune batok sa Park ‘N Go Bakeshop, 117-103 sa nagpadayong Power Forty Commissioner’s Cup basketball tournament didto sa Inayawan Sports Complex.

Ang maong kadaugan naghatag sa UTASSCO ug FC Fortune sa parehong 2-1 nga baraha ug nagtabla sa liderato uban sa Van System ug Allyn Farm.

Nangu sa UTASSCO mao si Wilbor Cabrera nga miburak og 37 puntos, si Alex Mercado midugang og 21 puntos ug si Gideon Bughao miamot og 17 puntos.

Sila si Edwin Dejacto ug   Rey Mabalcon parehong mi-iskor og 15 puntos aron pangulohan ang Water Market, samtang sila si Jun Nacional, Tony Ungria ug Allan dela Rama nitampo og 12 puntos matag usa.

Sa laing bahin, si Inayawan barangay councilor Mario Tabar miburak og 43 puntos aron pangulohan ang FC Fortune, samtang si Teroy Ebrado miamot og 28 puntos. Sila si   Nestor Javierto ug Dodong Piezas nagkumboya og 30 puntos.

Ang Park ‘N Go nga adunay 1-2 nga baraha, gipangulohan ni Jingjing Rama pinaagi sa iyang 37 puntos, gisundan ni Michael Arias nga miabuno og 26 puntos.  (BANATSPORTS)