Habal-Habal and Wanggits showdown sa Caduawan

CEBU, Philippines - Garbo sa Daanbantayan nga si Jonathan Cuyos, usa sa mga dakung haligi sa umaabot nga Keiz BJ Motors "Habal-Habal and Wanggits Showdown" nga mahitabo karong Domingo didto sa Caduawan, Tabogon sa amihanang bahin sa lalawigan sa Sugbu.

Ang pagsuporta ni Cuyos sa talagsaon ug kulbahinam nga lumba sa motor, agi'g regalo niya ngadto ni race organizer ug Keiz BJ Motors big boss Siegfred Ornopia, kinsa magsaulog sa iyang adlaw'ng natawhan karong adlawa.

Bag-o pa lang naulipon si Cuyos sa motocross ubos sa landong sa Keiz BJ Team ug bisan pa sa iyang kabag-o, nipakita dayon kini sa iyang katakus diin nakamaneho siya sa pagpahiluna sa ikaupat nga dapit sa executive division sa 2011 FIM's Asian Motocross Championships didto sa Palawan niadtong Marso 28.

Usa sa regalo ni Cuyos mao ang pagpagamit sa iyang higanteng ekipo nga "pay loader" nga napuslan og maayo sa paghawan ug ingon man sa pagpalapad sa race track.

"Daku na kaayo ang kausaban sa race track, sama na kalapad sa Palawan nga mao kanunay mo-host sa FIM's Asian Motocross Championships," matud pa ni Ornopia. "Mahimo na nga magdungan og pabulhot ang siyam ka riders," dugang ni Ornopia, ang nagdesinyo sa race track didto sa Caduawan.

Karong Domingo, si Cuyos moladlad na sab sa iyang abilidad batok sa mga tang-ang riders sa executive B ug C divisions.

Moapil usab ang duha niya ka anak ug umaabot nga bitoon sa motocross nga sila si Zeb ug Lyka Cuyos.

Dili sab magpa-alkanse ang tulo ka anak ni Ornopia nga sila si Earl Jean Brylle, Ken Kerry ug Kerry Keizer nga mopakita'g aksiyon sa tagsa-tagsa nila ka dibisyon.

Si Brylle molumba sa mini class, samtang sila si Ken ug Keizer adto magtikawtikaw sa peewee division.

Gawas sa executive division, laing kategoriya nga tigian mao ang Wanggits, Beginners Selection/Limited Edition, Local Enduro, Mini, Peewee ug Habal-Habal.

Mangu sa kampanya sa Wanggits mao si Tonyo Capadizo nga dugay nang nangandam ug nagpanikad na nga mopakita pag-usab sa iyang talagsaong katakus nga iyang nabatonan kaniadto.

Si Edmund Pingkian, ang marketing manager sa Haojue Phils nangahas sab nga mosakmit sa titulo sa Wanggits ug ingon man silang Esoy Cuesta, Sarge Espina, Jun Pestaño, Luis Antiquiado ug Dencio Borbajo.

Ang usa ka adlaw nga aksiyon, gipaluyohan sab ni James Ang, ang distributor sa PTT Lubricant, RMO Motorparts uban sa suporta ni Romy Ouano. - BANAT NEWS