Customs Brokerage mibawi sa ilang protesta

CEBU, Philippines - Alang sa birtud sa panaghiusa ug agi’g pagtamod sa tinuoray nga panaghigalaay, gibakwi sa Canillas-Gonzales (CG) Customs Brokerage ang ilang protesta batok sa MAJOS Customs Brokerage, kinsa mimakmak kanila niadtong Abril 2, 82-56 sa 1st Cebu Customs United Personeros Association (CCUPA) basketball tournament didto sa San Roque Parish gym sa Subangdaku, Mandaue City.

Matud pa ni Art Gonzales, ang co-owner sa CG Brokers nga nagkasabot na silang Roy Canillas nga dili na lang ipadayon ang protesta aron dili maguba ang panaghigalaay tungod kay matud pa nila daghan pa kaayong umaabot nga liga.

Misang-at og protesta ang CG human ilang nasayran nga adunay gipaduwa nga dili kwalipikado ang MAJOS ug dili sab konektado sa usa ka customs brokerage.

Human sa ilang sabot-sabot sa tagdumala sa MAJOS, ilang gihunong ang ilang protesta ubos sa kondisyon nga dili na paduwaon si Kenneth Yurag aron dili maguba ang ilang liga. - BANAT NEWS