Gaisano Capital milubong sa Lion Tiger Aerosol

CEBU, Philippines - Mipauwan og 11 ka triples ang Gaisano Capital sa ilang paglubong sa Lion Tiger, 67-48 aron maangkon ang solong liderato uban ang 4-0 nga baraha sa 5th CESAFI Partners' Cup basketball tournament niadtong Martes sa gabii didto sa Cebu Coliseum.

Mga Duwa Karon(Cebu Coliseum)

5:30 pm San Marino vs. Gaisano Capital

7:00 pm ,Ave Maria vs. Lion Tiger

Suwayan sa Gaisano Capital pagpaduol sa ilang tinguhang first round sweep karong gabii batok sa kanhi kampiyon San Marino Corned Tuna nga girepresentahan sa SWU Cobras ug tinguha nilang molampos sa six-game sweep karong Sabado batok sa Prime Asia Pawnshop, kansang 75-71 nga kadaugan sa overtime batok sa Rose Aquarius Merchandising naghatag kanila og balanseng 2-2 nga baraha.  

Ang Gaisano Capital naglisud sa unang-duha ka kuwarter ug wala kini makatilaw og labaw gawas lang sa 2-0 pagsugod ug nalubong og 10 puntos, 4-14 sa wala pa mahuman ang first period.

Ang Lion Tiger subli na sab nga nilabaw og 10 puntos, 21-13 sa oras nga 6:13 sa second quarter, apan ang maong labaw   nakan-an dihang si Gerald Ampoon ug Archie Batua mihimo og duha ka three-pointers matag usa nga mipasikit sa iskor, 28-31 sa halftime.

Wala magdugay, si Glenn Magallanes miposa og tulo ka triples sa iyang 13 puntos sa third period alang sa Gaisano Capital nga nisugod na sa pagkontrolar sa duwa ug dayon si Quinton Brian Heruela miabuno og laing duha ka triples sa final period aron tapuson ang misyon.

Ang 6-foot-9 nga si Junemar Fajardo maoy topscorer sa Gaisano Capital sa iyang 14 puntos, samtang si John Michael Abad mao sab ang nangu sa Lion Tiger pinaagi sa iyang siyete puntos.

Sa sayo pa, si Giovanni Padillo miposa og 22 puntos aron pangulohan ang Prime Asia, samtang si Fritz Dajalos mibahog og 19 puntos alang sa pilderong Rose Aquarius.

Puntos Matag Usa

Unang duwa:

Prime Asia (75) - Padillo 22, Cortes 11, Cantonao 10, Magat 8, Otida 7, Codilla 6, Santos 3, Bautista 3, Panerio 3

Rose Aquarius (71) - Dajalos 19, Sedurifa 10, Avila 6, D. Feeraren 5, Fuentes 4, Cabahug 3, J. Ferraren 3, Genobia 2, Misa 2, Nudalo 2, Corcilles 2, Sollano 1, Meca 1, Maraño 1

Ikaduhang duwa:

Gaisano Capital (67) - Fajardo 14, Magallanes 13, Heruela 7, Ampoon 7, Mohmmad 6, Batua 6, Pao 6, Labolabo 4, Aranas 2, Delos Santos 2, Caytuna 1

Lion Tiger (48) - Abad 7, Avellanoza 6, Silva 4, Saycon 4, Premacio 4, Codilla 4, Arong 3, Cincoflores 3, Belano 2, Perolino 2, Olivares 1. - BANAT NEWS