John Flores misulbong sa 13th Ornopia Cup

CEBU, Philippines - Sa gilauman, ang Sugbuanong si John Flores maoy nisakmit sa titulo sa expert division sa 13th Ornopia Cup nga nagsilbeng fourth leg sa 2011 MS Motosuit Motocross Series niadtong Domingo didto sa Brgy. Calambua sa San Remigio.

Gipahimuslan ni Flores ang wala pag-apil sa mga top contenders sama nilang Jonjon Adlawan, Kimboy Pineda ug Pepo Rubi.

Gipilde ni Flores si Rex Barbaso alang sa korona sa experts open, samtang si Jubenille Abellar nalabay ngadto sa ikatulo.

Pakyas hinuon si Flores sa pagposte og dobleng kadaugan dihang napunta kini sa ikatulo human makasugat og problema sa iyang motor sa kinabkabay sa pro open nga gidominar ni Abellar ug gisundan ni Barbaso.

Ni-okupar sab sa ikatulo si Flores sa intermediate open nga giharian ni Cyril Tariman. Sa ikatulong higayon, si Barbaso nipuwesto sa ikaduha nga dapit.

Si Tariman mao sab ang nanghawod sa novice open production, gisundan nilang Omar Sabal ug Dongkey Sanchez.

Sa laing bahin, si Rey Quirol mihakot og duha ka titulo human maghari sa beginners open production ug local enduro.

Gipukan ni Quirol si Miguel 'Amboy' Antiga sa beginners open production ug Dong-Dong Batiquin sa local enduro.

Ang big bos sa Keiz BJ Racing Team nga si Siegfred Ornopia maoy naghari sa executive B batok nilang Jun Enriquez ug Roscel Gungob.

Ang executive C nadaog ni Jaime Ponce uban ni Jerry Sicad ug Dandan Gastador nga niokupar sa ikaduha ug ikatulo nga dapit.

Sa underbone category, si Kent Limpag maoy nanghawod batok nilang Mark Frasco, Ike Tumbiga, Smith Supatan ug Kenneth Engus.

Tulo ka mga anak ni Ornopia nga sila si Kerry Keizer, Ken Kerry ug Earl Jean Brylle nalakip sa top five sa tagsa-tagsa nila ka dibisyon. 

Sila si Kerry ug Ken nitapos sa ikaduha ug ikaupat sa peewee 50 nga gidominar ni Reggie Pepito, samtang si Brylle, Kerry ug Ken nitapos sa ikaduha, ikatulo ug ikaupat sa mini 65 nga giharian ni Tom-tom Largosa.

Pakyas si Brylle paglangkat sa korona sa mini class human napilde ngadto ni JP Cuesta. Si Denmar Supatan niangkon sa ikatulo.

Ang usa ka adlaw nga kompetisyon nagmalampuson pinaagi sa pagbulig sa Petron Sprint 40, Mayor Jay Olivar, Congressman Benhur Salimbangon, Engr. Susan Ornopia, Nap Pepito, Siegfred Ornopia ug Keiz BJ Motor Sales, F&FO Motor Parts, RMO Motor Parts, JCO Motorparts, Prospeed Motor Parts, Motomaze Motor Parts, Dr. Andy Uy, Cevetco, Emma Dosdos ug Dado Navares ug sa iyang pamilya, Calambua barangay officials ug A&G Bikeshop.   - BANAT NEWS