CEBU, Philippines - Mihaon og laing daog ang Fe's Lechon sa pagpangulo ni Vincent Montefalcon batok sa Mactan R. Isla, 74-65 sa United Pusok Balls Club (UPBC) basketball tournament didto sa Brgy. Pusok open court, Lapu-Lapu City.
Wala kapugngi ang pagmangtas ni Montefalcon sa second half diin iyang gipangulohan ang mainitong rally sa Fe's Lechon aron makan-an ang daku nilang alkanse ngadto na lang sa siyete puntos, 28-35 sa halftime.
Si Montefalcon midawdaw og 28 puntos alang sa Fe's Lechon, kinsa wala na molingi pa human nilabaw og dos puntos, 52-50 paingon sa final period.
Mirehistro sab og double figures sila si Bitoy Allecer ug Rannie Emperio alang sa Fe's Lechon nga parehong tag-11 puntos.
Ang Mactan R. Isla gipangulohan ni Chou nga mibugha og 24 puntos, gisundan ni Arvil pinaagi sa iyang 10 puntos.
PUNTOS MATAG USA
FE'S LECHON (74) - Montefalcon 28, Allecer 11, Emperio 11, Linao 6, Baguio 6, Telebangco 4, Muldez 3, Cañete 3, Pulgo 2
MACTAN R. ISLA (65) - Chou 24, Arvil 10, Korl 9, Alvin 7, Alvin 6, Nadz 6, Rez 3 - BANAT NEWS