CEBU, Philippines - Nilampos ang barangay Looc pagdepensa sa ilang korona sa women's division, samtang ang Centro milangkat sa men's title sa 4th Mandaue City Mayor's Cup Volleyball Tournament didto sa Mandaue city hall grounds.
Ang Looc ni coach Grace Antigua yano kaayong midismantol sa Umapad, 25-23, 25-21, 25-22 ubos sa mainitong atake ni kanhi RP Youth member Genie Sabas, RP Beach Volley mainstay Jusabelle Brillo, Lynneth Auza ug Mariel Froilan.
Sa pikas bahin, ang Centro niagi una og upat ka set sa wala nila palagpota ang Subangdaku, 25-22, 16-25, 25-19, 25-24.
Nakatabang og daku sa kadaugan sa Centro mao sila si Clifford Café, Julius Heyrosa, Wendell Alcos ug Adrian Cabahug.
Ang Banilad maoy ni-okupar ikatulo sa men's division, samtang ang Centro napunta sab sa ikatulo sa women's category.
Gawas sa mga tropeyo ug medalya, ang mga kampiyon nibulsa og P20,000 matag usa, ang second placers nakaangkon og P15,000, samtang ang third placers nakadawat og P10,000 matag usa.