3-0 tuyo sa topseeds

CEBU, Philippines - Pagkulit sa sagunson ug ikatulong daog maoy tumong karon sa duha ka seeded Teams ang Gaisano Capital ug ang Lion Tiger-Aerosol dihang ilang ikasangka ang lain-laing karibal karong gabhiona atol sa pagpadayon sa 5th CESAFI Partner’s Cup diha sa Cebu Coliseum.

Suwayan sa Gaisano Capital pagbulsa sa ilang ikatulong daog dihang ilang ikasangka ang Aquarius Merchandising.

Sa sunod duwa, ang Lion Tiger na sab maoy mosalida nunot sa ilang tinguhang makahipos sa ilang ikatulong daog dihang ilang ikabagat ang upset-seeker nga Winner Beef Loaf ug sa ikatulo ug kataposang sangka, makigtakos ang San Marino Corned Tuna batok sa wala pay daog nga Prime Asia Pawnshop.

Manghinaut ang Gaisano Capital nga si Junemar Fajardo na maoy mangulo sa opensa karong gabhiona aron bawi-on ang iyang ubos kaayong three-point performance dihang midaog sila batok sa Ave Maria Sanctuary Park sa miaging semana sa iskor, 72-68.

Usa lang si Fajardo sa labing hait nga hinagiban alang sa Gaisano Capital ug nagkinahanglan sab siya’g suporta gikan nilang Edward Pao, Robinson Mohammad, Gerald Ampoon ug big guard Quinton Brian Heruela.

Ang Rose Aquarius mosandig sa mangso-ong Ferraren—Dennis ug James, Fritz Dajalos, Randy Avila ug Joshua Corcilles.

Ang Lion Tiger kinsa maoy mas paborito batok sa Winner Beef Loaf, yano kaayong mimakmak sa Prime Asia kaniadtong Huwebes ug pipila sa ilang pambato mao sila si Ralf Olivares ug Phil Marcader samtang ang Winner Beef Loaf magsalig kanilang Chester Curso, Allan Dimco, Steve Castro, Floyd Taboada ug Franklyn Batiquin.

Sa laing bahin, ang San Marino pangulohan ni Rene Pacquiao sa ilang tinguha nga mokulit sa ilang ikaduhang daog sulod sa tulo ka duwa samtang ang 0-2 nga Prime Asia mosalig kanilang Michael Cantonao, Giovanni Padillo, Joven Cid Cortes, Robert Gines Codilla ug Mark Gil Panerio. (BANAT NEWS)