CEBU, Philippines - Ang Mandaue-Cebu Landmasters mo-host ngadto sa Talisay City sa labing unang higayon sa pagpadayon sa 1st M. Lhuillier Kwarta Padala-Cebu Basketball Association (MLKP-CBA) basketball tournament karong gabii didto sa Mandaue City Cultural and Sports Complex.
Sa dili pa magsambunot ang Mandaue ug Talisay, ang Asian College of Technology (ACT) Cyber Knights ug Hotel Fortuna magsangka una sa usa'g-usa sa alas-6 sa gabii.
Ang Landmasters moduwa sa ilang tugkaran moparada sa ilang talented homegrown kids nga silang Frangel Omolon ug Jerwin Espina, kinsa suportahan nilang Kelvin Juliane, Jared Kane Abatayo, Ronan Isidro, Marwin Tundag ug Franklin Nailon.
Samtang ang Talisay nga nibuntog sa Cyber Knights sa miaging semana, naglaraw sa ilang unang sunod-sunod nga kadaugan niini nga torneyo.
Sa laing bahin, ang second-ranked Ave Maria Sanctuary Park (3-1) tinguhang mobangon human masugamak ngadto sa solo leader SCSIT Skyblazers (4-0) sa dihang harungon nila ang Hotel Fortuna nga adunay 1-2 nga baraha.
Ang Ave Maria magsalig nilang Danny Aying, Jercules Tangkay, Alex Cainglet, Aldrin Ocañada ug Gerry Cavan, samtang ang Hotel Fortuna nga kasagaran gilangkuban sa mga magduduwa sa SWU Cobras magsandig nilang Marlon Basco, Vernini Tangarorang, Eric Zanoria, Clefford Maguate, Chris Litorja, Jefferson Pria ug Aard Evan Diango. (BANATSPORTS)