Bautista-Ruiz rematch sa Hunyo 11

CEBU, Philippines -  Sa panultion pa sa mga   katigulangan, "ang mag-antos, ma-santos" ug mao kini ang nakab-ot ni ALA knockout superstar Rey 'Boom Boom' Bautista human sa tulo ka tuig niyang paghandom.

Ang Bol-anong si Bautista gihatagan og higayon sa pagpanimalos ngadto sa Mehikanong si Heriberto Ruiz "Pinoy Pride 6: Grudge Rematch" karong Hunyo 11.

"We work hard for this event, we know this is his (Bautista) dream, he asked for the fight and we are all glad that we made it," matud pa ni ALA Promotions President Michael Aldeguer atol sa press conference sa miaging adlaw didto sa Palmas del Mar Resort and Hotel sa Bacolod City.

Si Ruiz, 33-anyos, maoy nihatag ni Bautista sa ikaduha niining kapildihan niadtong Nobiyembre 22, 2008 didto sa Las Vegas. Apan ang garbo sa Candijay-Bohol wala mobilib sa gipakita ni Ruiz sa una nilang sangka. Sumala pa ni Bautista nga rason sa iyang kapildihan mao ang gidala-dala niya nga sakit sa walang kamot human makaangkon og injury atol sa sangka nila ni Daniel Ponce de Leon.

"Dugay na nako ning gihuwat, makabawos ko ani nga fight, kabalo ko napilde ko pero dili nako i-excuse akong injury sa kamot," matud pa ni Bautista.

Sa iyang bahin, si ALA chief trainer Edmund Villamor namahayag nga nag-andam na sila og game plan batok ni Ruiz, human sa third round knockout nga kadaugan ni Bautista batok ni Alejandro Barrera niadtong Enero 29. (BANATSPORTS)