CEBU, Philippines - Molarga na karon si Jonjon Adlawan paingon sa Denmark alang sa sunod-sunod nga kompetisyon.
Si Adlawan nidaog isip best placed Pinoy rider sa round 1 sa FIM's Asian Motocross Championships sa miaging bulan.
Ang engineering student sa University of San Carlos (USC) temporaryo mopuyo didto sa Denmark hangtod sa katapusang semana ning bulana.
Mga lumba nga apilan ni Adlawan naglakip sa Roskilde karong Abril 16, Herning sa Abril 21, Kalundbrog sa Abril 24 ug Bornholm sa Abril 30.
Ang back-to-back MS Motosuit "Rider of the Year" ug SAC-SMB All-Cebu Sports Awards honoree nga si Adlawan ubanan sa iyang amahan nga si Jonas ug sa inahang si Leila.
Kini maoy unang biyahi ni Adlawan didto sa Denmark, apan daghan na siya'g naapilan nga international tournaments. (BANATSPORTS)