Karon sa Power Forty
CEBU, Philippines - Nasakmit sa Allyn Farm ang solong liderato human nila pakurati ang Van System, 100-89 sa nagpadayong Power Forty Commissioner’s Cup didto sa Inayawan Sports complex.
Sa sayo pa, gipug-an sa Park ‘N Go Bakeshop ang Water Market, 94-83 alang sa ilang unang daog sa duha ka duwa.
Ang Allyn Farm ug Van System nagtabla karon sa standing nga pulos nagbitbit og 2-1 nga baraha.
Sila si Joel Cañete ug Carding Vernaiz maoy nagmangtas alang sa Allyn Farm nagkumboya og 51 puntos. Si Cañete miburak og 27 puntos, samtang si Vernaiz mibahog og 24 puntos. Si Adot Tabar miamot og 19 puntos ug si Titing Moniva mitampo og 12 puntos.
Si Fernando Sumarago maoy nangu sa Van System sa iyang 23 puntos, gisundan ni Celso Cabaluna nga adunay 16 puntos.
Sa laing bahin, mikamada og 31 puntos si Jingjing Rama aron pangulohan ang Park ‘N Go ug si Michael Arias mipabuto'g 22 puntos.
Ang Water Market gipangulohan nilang Allan dela Rama ug Edwin Dejacto nga miposa og 18 ug 14 puntos matag usa. Si Jun Nacional mitampo og 12 puntos, samtang si Tony Ungria miligwat og 11 puntos alang sa Water Market nga nahimutang sa kinailawmang bahin sa ilang 0-2 nga baraha. (BANATSPORTS)
- Latest
- Trending
