PNHS miyukbo sa USLS-Bacolod

CEBU, Philippines - Pambato sa Sugbu, ang Pajo National High School (PNHS) Lady Vipers wala kasustiner sa ilang momentum dihang miyukbo ngadto sa University of St. La Salle-Bacolod sa ikaduhang adlaw sa Shakey's Girls Volleyball League nga giuloha'g "Tournament of Champions" didto sa Bacolod City.

Human sugdi ang ilang kampanya uban ang 25-4, 25-19, 25-17 nga kadaugan batok sa New Ormoc City National High School, ang PNHS ni coach Fr. Rolando T. Manayon, napukan ngadto sa tag-as nga USLS-Bacolod belles sud sa straight sets, 25-19, 25-16, 25-19.

Sa laing duwa, ang kanhi national champion Hope Christian School milansang sa ilang duha ka sunod-sunod nga daog gikan sa Davao, 25-23, 25-23, 25-22 ug sa Central Philippines University (CPU) 20-25, 25-15, 24-26, 25-22, 15-13.

Paninguhaon ni Fr. Manayon nga modaog sila batok sa Hope Christian School aron may kahigayonan kini nga mosud sa finals gumikan kay wala may crossover semis.

Ang top two teams automatic nga magsangka alang sa kampiyonato. (BANAT NEWS)